Uncategorizedحكاوى الفنحكاوى مصر

“دموعي مبتقفش” .. أول تعليق من رامي جمال بعد إعلانه عن إصابته بالبهاق والاعتزال

نسرين الرشيدي

بعد إلتزامه الصمت على مدار اليومين الماضيين فور إعلانه إصابته بمرض “البهاق” وإتخاذه قرار الاعتزال، وجه المطرب والملحن رامي جمال رسالة شكر لجمهوره وأصدقائه في الوسط الفني، بسبب دعمهم المتواصل له منذ إعلانه ما سبق.

وقال رامي جمال في أول تعليق له عبر صفحته على موقع التدوينات القصيرة “تويتر” : “الحمد لله أولا وأخيرًا.. أنا عاوز أقول كلام كتير عن اللي شوفته منكم.. كلمة شكرًا قليلة على مشاعركم وعلى رقي كلامكم وعلى الوقت اللي ضيعتوه علشان تحسنوا الصورة المظلمة اللي كانت في عيني”.

وتابع : “أنا بقيت شايف الابتلاء دة هدية من ربنا علشان أشوف الحب دة.. والله دموعي مبتقفش وأنا بشوف كلامكم.. أوعو تبخلوا على أي حد بدعم نفسي زي اللي دعمتوني بيه”.

وأضاف: “إحساس الحب بينور الدنيا بيرجع الروح والأمل اللي أنتم عملتوه ميتقدرش.. ثانيًا عاوز أشكر زملائي الفنانين على كل كلمة حلوة وكل دعم شفته، هي دي الروح اللي نفسي تفضل موجودة مش بس بعد المرض ولا الوفاة.. الكلام الحلو قولوه على طول.. ليا ولغيري بيفرق جدًا.. الحب بيغير الضلمة لنور”.

وتابع : “ثالثًا لكل القنوات اللي بتحاول تتواصل معايا من إمبارح علشان تطمن عليا بشكركم جدًا بس أنا كتبت البوست ده علشان أنهي حمل على قلبي مش علشان أبقى تريند.. بشكركم طبعا بس أتمنى لما تقرروا تستضيفوني يبقى على عمل فني مش مرض.. مقدر شغلكم طبعًا بس أنا مش قابل فكرة مريض.. أنا الحمد لله اتأكدت بكلام الناس أني مش خايف ومش هترفض.. فبلاش أي حاجة تتفهم غلط شكرًا على اهتمامكم ومقدره، وبشوفكم في لقاءات فنية بعد نزول ألبومي ده أفضل نفسيًا كتير ليا”.

واختتم : “مفيش مانع ساعتها نتكلم عن أني إزاي اتعايشت بيه وهتعايش بيه لو ليا عمر الحمد لله علي الابتلاء.. الحمد لله علي حبكم ودعمكم ده دين هعيش بيه خلصتوني من سجن كنت عايش بيه كنت بصحي قبل ما أغسل وشي أعد البقع وأشوفها زادت ولا لا.. النهاردة صحيت نزلت وحبيت المحنة اللي ورتني قلوبكم وجمالها شكرًا من قلب قلبي”.

اظهر المزيد
زر الذهاب إلى الأعلى